Kotsi ye šoro magareng ga sefatanaga sa maphodisa le theraka e tlogetše lephodisa le bagolegwa ba 5 ba hlokofetše

Batho ba 6, go akaretša lephodisa le bagolegwa ba 5 bao ba be go ba letetše tsheko ba hlokofetše ka morago ga gore sefatanaga sa maphodisa seo ba be go ba sepela ka sona se thulane le theraka tseleng ya R101 magareng ga Mokopane le Mookgophong, ka Labone, 14 Phato.

Kotsi ye e tlogetše bagolegwa ba bangwe ba 6 le dikgobalo. Ba bararo ba išitšwe bookelong bja HF Odendaal ka Modimolle, o tee a fofišetšwa bookelong bja Polokwane, gomme ba babedi ba išwa bookelong bja Voortrekker ka Mokopane.

Molekgotlaphethiši wa Dinamelwa le Tšhireletšo ya Setšhaba, Susan Mathye o laeditše go nyama ga gagwe le go lebiša mantšu a hlobošo go malapa a bao ba hlokofetšego, mme a lakaletša bao ba gobetšego gore ba kaonafale ka pela. O re seo se hlotšego kotsi ye se swanetše go nyakišišwa.

“Kgoro e tla tšwela pele le šoma le ba molao go netefatša polokego ditseleng,” gwa realo Mathye. “Re kgopela baotledi ka moka go otlela ka hlokomelo mme ba latele melao ya polokego ditseleng go thibela ditiragalo tše mpe,” Lefelo la kotsi le hlwekišitšwe gomme R101 e buletšwe sephethephethe.