Batho ba ba bedi ba hlokofetše mme o tee a gobala morago ga go thuntšhwa lebaleng la setiši sa maphodisa sa Burgersfort

Maphodisa a Limpopo a thomile dinyakišišo ka morago ga go thuntšhwa ga batho ba bararo ka gare ga lebala la setiši sa maphodisa sa Burgersfort ka Sontaga, 14 Lewedi.

Go ya ka maphodisa, ditiragalo tše di diregile nakong ya ge maphodisa ao a bego a le mošomong a tla kwa modumo wa sethunya gomme ba kitimela ka ntle, moo ba hweditšego bahlaselwa ba bararo ba rapaletše kgauswi le difatanaga tše pedi.

Mmoleledi wa maphodisa a Limpopo, Colonel Malesela Ledwaba o re monna wa mengwaga ye 31 le mosadi wa mengwaga ye 39 ba hweditšwe ba hlokofetše lefelong  la tiragalo ke bahlapetše ba thušo ya pele.

“Mosadi wa mengwaga ye 28, yo a hweditšego dikgobalo tša go thuntšhwa, o išitšwe bookelong gore a hwetše kalafo,” a realo.

Ledwaba o re dinyakišišo tša mathomo di bontšha gore monna yo a hlokofetšego le mosadi yo a gobetšego ke banyalani. “Go belaelwa gore monna yo a ka ba a ithuntšhitše ka sethunya. Mabaka a gore mosadi wa mengwaga ye 39 a be mo lefelong ga a tsebege ka se sebaka,” a realo.

Maphodisa a hweditše sethunya, dibetša le dikarata tša dithunya mo lefelong. “Dinyakišišo tša polao, maiteko a polao di šetšwe di butšwe mme maphodisa ba tšwela pele ka dinyakišišo,” gwa realo Lwdwaba.

Mokhomišinare wa maphodisa a profense, Lieutenant-General Thembi Hadebe o bontšhitše go makala le go nyamišwa ke ditiragalo tše, gomme a laela gore dinyakišišo di etišwe pele.