Masepala wa Polokwane o tšwela pele go hlaselwa ke ditatofatšo tša bomenetša

Masepala wa Polokwane o tletše ka ditatofatšo tša bomenetša.

Se se latela dipego tša gore kontraka ya boleng bja R56 millione e abetswe khamphane yeo e amanago le molekani wa molaodi wa mmasepala yo a tšwago Zimbabwe ka mokgwa wo o se go molaong. Gothwe se se diregile ka tumelelo ya Meyara John Mpe.

Ditatofatšo tše di galefešitše mekgatlo ya kganetšo le setšhaba bao ba nyakago gore go dirwe dinyakišišo tšeo di tseneletšego ka lebaka la se ba se bitšago “boradiya bjo bo bonagalago le tšhomišo mpe ya maatla,”

Taba ye e oketša matshwenyego a setšhaba ka ditshepedišo tša go se latele molao nakong ya kabo ya ditirelo ka gare ga mmasepala wo o šetšego o tsebega ka ditatofatšo tša go hlokomologa mekgwa le tšhomišo mpe ya tšhelete.

Ka ge dipolelo di dutše di oketšega, go na le pitšo ya gore dihlongwa tša go swana le Hawks le Special Investigating Unit (SIU) di tsene go nyakišiša taba ye.

Le ge go le bjalo, Meyara John Mpe o itatola ditatofatšo tše ka gore ke maaka, ke tšeo di senyago leina ebile di hlohleletšwa ke dipolotiki.

“Ditaba tše di bolelwago gore molaodi o file kontraka ya R56 millione ka mokgwa wo o se go molaong go khamphane ya ‘lesogana la gagwe la Zimbabwe’ ka tumelelo ya meyara ke maaka, go senya leina, gape ke lehloyo la bafaladi,” a realo.

Mpe o rile ga go na kabo ye bjalo ya kontraka. “Ditaba tšeo di šomišwa bjalo ka dibetša tša go hlasela baetapele ba mmasepala ka maikemišetšo a go senya maina a bona,” a realo.

O re ditlhaselo tše di tšwelela ga ntši ge go batametše dinako tšeo di kgethegilego dipolotiking, gomme di bonagala e le karolo ya leano le legolo la bao ba lahlegetšwego ke maatla a dipolotiki.

“Molao ga o thibele dikhamphani tša bafaladi go šoma le dimasepala, ge fela di latela melao ya naga, go akaretšwa le go ba le mangwalo a maleba,” a hlalosa.

Mpe o re mmasepala o šoma le dikgwebo tše fetago lekgolo le baabi ba ditirelo ba go fapana. “Go a belaetša ge go le khamphane tše mmalwa fela tšeo di hlathwago,” a realo.

O re yena bjalo ka meyara ga a na seabe mo kabong ya dikontraka.