Mogolegwa yo a tšhabilego kgolegong o swerwe gape

Mogolegwa yo a tšhabilego kgolegong dikgwedi tše tharo tšeo di fetilego o swerwe gape gammogo le modirišani ka yena.

Mmoleledi wa maphodisa a Limpopo Colonel Malesela Ledwaba ore bagononelwa ba babedi, bao ba nago le mengwaga ye 34 ba swerwe ke maphodisa a  Yuniti ya Dinyakišišo ka Burgersfort lefelong leo le hirišwago motseng wa Ga-Manyaka.

“Maloko a amogetše tshedimošo ka ga lefelo leo mogolegwa yo a bego a letetše gomme a tšhabilego diseleng ka Mopitlo a be go a le ka go lona,” Ledwaba o boletše.

 “Ba ile ba latela ka nepo dithlahlo, moo mogononelwa wa mengwaga ye 34 a ilego a swarwa lefelong la bodulo leo le hirišwago motseng wa Ga-Manyaka. Nakong ya go swarwa, o be a na le mogwera wa gagwe. Maphodisa a ile a phuruphutša lefelo leo gomme a hwetša sethunya seo se se nago laesense le sellathekeng seo go gononwago gore se utswitšwe.”

Ledwaba o okeditše ka gore sellathekeng seo se amana le go thubja ka dibetša mo go begilwego kgweding yona ye.

Modirišani wa mogolegwa o ile a swarwa ka baka la go ba le dithoto tšeo go gononwago gore di utswitšwe, mola yena a ile a swarwa ka baka la go ba le dithoto tšeo go gononwago gore di utswitšwe, go swara sethunya seo se se nago mangwalo a tumelelo le go tšhaba kgolegong ya molao.

 “Mogolegwa yo a tšhabilego yo a swerwego gape o kile a swarwa ka lebaka la go swara sethunya seo se se nago mangwalo a tumelelo le melato ya go thuba ka dibetša,” Ledwaba a realo. 

Bagononelwa ba tla tšwelela pele ga Kgorotsheko ya Mmaseterata ya selegae ka Mošupologo, la 23 Mosegamanye 2025 ka ditatofatšo tša go swara dithoto tšeo go gononwago gore di utswitšwe, go thuba, le go swara dithunya tšeo di se nago mangwalo a tumelelo.