Modiragatši wa go tuma Meme Ditshego o hlokofetše 

Modiragatši yo a thopilego sefoka Meme Ditshego (60) o hlokofetše ka Laboraro morago ga go robatšwa sepetlele nako ye kopana.

Bolaodi bja gagwe e lego Eye Media Artists, bo netefaditše lehu la gagwe ka Labone.

 “Ke ka manyami a magolo le tlhompho ge re tsebiša ka go hlokofala ga Meme Ditshego – modiragatši yo a rategago wa Afrika Borwa, talente ya metlae ya dinonwane le mogale wa nnete wa thelebišene le sefala sa rena,” setatamente sa Eye Media Artists  se realo.

“Meme o hlokofetše mantšiboa a la 25 Mosegamanye a tlogela bohwa bjo bo akaretšago mengwagasome le meloko. E be e le mmulamadibogo wa tiragatšo – mosadi yoo moya wa gagwe wo o phelago, bohlale bjo bo bogale le go ba gona mo go sa ganetšegego di tlišitšego bophelo go tema ye nngwe le ye nngwe yeo a e ralokilego.”

Ditshego o thomile leeto la gagwe la go bapala dipapading tša difilimi pele a tsenela Dibapadi tša Sobonile tšeo di nago le khuetšo gomme a dira maemo a gagwe a mathomo a thelebišene ka 1997 go SABC2’s Sterk Skemer gomme a latelwa ke The Coconuts (2007).

O ile a bapala karolo ya Josephine tiragatšong ya Ga Re Dumele mengwaga ye tshela mo a thopilego sefoka sa SAFTA ka 2012. 

O ile a boela a tšwelela go Giyani: Land of Blood, Skeem Saam, le Broken Vows.  Bolaodi bja gagwe, Eye Media Artists bo boletše gore ba ema le lapa la gagwe nakong ye e bohloko.

Dintlha tša poloko le tirelo ya segopotšo ga se tša tsebišwa ga bjale.