Pfano o tsenetše lebelo go thoma Pretoria go fihla Thohoyandou kgahlanong le dikgaruru tša bong 

Ka Mogale Mohale

Pfano Ungedzani o ikemišeditše go lwantšhana le dikgaruru tša bong (GBV).

 

Pfano (26) go tšwa motseng wa Tshidzima ka ntle ga Thohoyandou o ile a tsenela lebelo go thoma Pretoria go fihla Thavhani Mall, Thohoyandou.

 

O kitimile 448km lebelong le go matšatši a 12 go thoma ka Sontaga, 1 Phupu.

 

O be a kitima go feta 40km ka letšatši mme o kgonne go fihla nhloreng. O fihlile Thavhani Mall ka Labohlano, 13 Phupu ka tšhomišano le Makoma Foundation, Mbhofo Youth Ministry gammogo le batšeya karolo ba bangwe.

 

O re o be a ka se kgone go ema a bona basadi le bana ba hlokofatšwa ebile ba bangwe ba bolawa medirong ya GBV, a bona gore o swanetše go dira se sengwe.

 

“Ke nyaka go lwa ke fediše GBV. e dumela gore nka kgona go fihlelela se ka dipapadi. Ge re ka ba ngatana ye tee ka dipapadi, re ka kgona go fediša hlobaboroko ye ka gore ga gona motho yo a swanetšego go boifa o mongwe,” a realo.

 

Nepo ya gagwe ke go aga lefelo la dipapadi moo baswa ba tla ralokago mehuta ya dipapadi gona, gomme yena a boledišana le go ba hlahla ka bokotsi bja GBV.

“Ke na le bathekgi efela ke sa nyaka ba bangwe gore re kgone go aga moago wa dipapadi motseng wa gešu go ba Thohoyandou. Ke nyaka go hlahla baswa le go bopa megopolo ya bona gore ba be batseta ba GBV setšhabeng,” a realo.

 

Pfano o dumela gore ge ba ruta baswa ka GBV e sa le ba ba nnyane, ba tla gola ba tseba sa go loka le sa go se loke.

 

“Moago wa dipapadi o ile go fetola megopolo ya baswa kgahlanong le GBV. Ba tla dira se ba raloka dipapadi tšeo ba di ratago,” a realo.

 

O hweditše hlohleletšo ya go thoma lebelo le ka morago ga go bona kgolo ya melato ya GBV Limpopo ka bophara.

 

O hweditše kamogelo ya segoši nakong ya ge a fihla mafelelong a lebelo la gagwe Thavhani Mall mme setšhaba se mmona bjalo ka mofenyi.