Constable Lydia Thubana o keteka phihlelelo ya gagwe ya thuto

Ka go kgotlelela le boikgafo bja go ithuta bophelo ka moka, Konstabole Lydia Thembisile Thubana wa Tirelo ya Maphodisa ya Afrika Borwa (SAPS) o sa tšwa go aloga ka Bachelor of Arts in Public Policy ka mengwaga ye 41.

Thubana o ile a thoma go šoma bjalo ka lephodisa la moithaupi ka ka 2007. Leeto la gagwe le swailwe ka boikgafo go bobedi phethagatšo ya molao le kgolo ya gagwe.

“Leeto la ka le laetša tumelo ya gore motho a ka mekamekana mošomo le thuto kgatong efe goba efe ya bophelo,” Thubana o boletše nakong ya moletlo wa gagwe wa go aloga ka Labobedi. 

Mošomong wa gagwe wa mengwaga ye 14, o swere dikarolo tše bohlokwa, go tloga nakong ya gagwe ka Laporatori ya Forensiki go fihla maemong a gagwe a bjale ka Vala Umgodi Tactical Operations Center ka Limpopo, moo a lebeletšego kudu go netefatša polokego ya setšhaba.

Diphihlelelo tša Thubana tša thuto di a kgahliša. Go bapa le lengwalo la gagwe le leswa, o na le Diploma ya Public Administration le Management,  Diploma go Criminal Justice,  gomme o tšweletša dithuto tša gagwe tša Honours go International Politics.

“Boineelo bja gagwe bo šoma bjalo ka tlhohleletšo go ba bangwe ka sephidiseng,” go boletše Mokapotene Sipho Nkosi, mošomi mmogo wa SAPS.  

Thubana o na gape le ditifikeiti tše di fapafapanego ka dikarolong tša go swana le go hlokomela le go sekaseka, taolo ya maano, le taolo ya lešaba, go tiiša boikgafo bja gagwe go tlhabollo ya profešene.

Ge a thoma kgaolo ye e latelago ya mošomo wa gagwe, kanegelo ya Lydia ke kgopotšo ye maatla ya gore go phegelela tsebo ga go tsebe mellwane ya mengwaga.

Diphihlelelo tša gagwe di hlohleletša ba bangwe go phegelela bokgoni bjo bobotse ka go se kgaotše le go bontšha khuetšo ye kgolo yeo batho bao ba ineetšego ba ka bago le yona ditšhabeng tša bona.