Komiti ya taolo ya ANC Limpopo e ganeditše Stan Mathabatha go ikgaoganya le mešomo ya gagwe bjalo ka modulasetulo

Komiti ya taolo ya profense ya Limpopo mokgatlong wa African National Congress e ganne sephetho sa Modulasetulo wa profense, Stan Mathabatha sa go ikgaoganya le mešomo ya gagwe bjalo ka modulasetulo.

Se se latela morago ga gore Mathabatha o kgopele go ikgaoganya bjalo ka modulasetulo wa ANC profenseng ya Limpopo, a bolela ka matshwenyego a gagwe mabapi le maitshwarompe le go tlogela mekgwa ye megolo ya mokgatlo.

O boletše gape gore go ata ga maitshwarompe le go senyega ga botshepegi bja mokgatlo, kudu mabapi le dikopano tša go kgetha baetapele ba dilete tša Vhembe le Waterberg ke mabaka a magolo a sephetho sa gagwe.

Ka morago ga dipoledišano komiti e ile ya tšeya sephetho sa gore Mathabatha a tšwele pele a le maemong a gagwe ka ge a kgethilwe ke makala a ANC, gomme a tšwele pele a dira mediro ya gagwe go fihlela mafelelo a nako ya gagwe ya mošomo. Sephetho se se kwalakwaditšwe ke mongwaledi wa mokgatlo, Reuben Madadzhe ka Mošupologo, 22 Lewedi.

Madadzhe o re ba tiišitše boitshepo bja bona ka boetapele bja Mathabatha. “Re laela bašomi ba rena go thoma tshepedišo ya go matlafatša botee, yeo e swanetšego go oketša tšhomišano le kwano ka gare ga komiti, profense ka bophara le makaleng a ANC,” a realo.

Madadzhe o re sephetho sa bona sa go gana Mathabatha a tlogela mošomo wa gagwe se tla romelwa go boetapele bja ANC maemong a bosetšhaba.