Sefatanaga sa mabonwa sa Porche seo se utswitšwego se hweditšwe se ntšhitšwe diriparipa 

Ka Mogale Mohale

Sefatanaga sa mabonwa sa Porche Cayenne seo se utswitšwego se hweditšwe se ntšhitšwe diriparipa.

 

Sefatanaga seo se hweditšwe lefelong la go lokišwa difatanaga go la Nirvana, Polokwane ka Laboraro, 9 Mosegamanye.

 

Maphodisa a ile a golega bagononelwa ba bararo ba mengwaga ya magareng ga 35 go ya go 49, go akaretša le mong wa lefelo leo.

 

Ge maphodisa a fihla lefelong leo, a hweditše sefatanaga seo sa mabonwa se ntšhitšwe diriparipa. Dinyakišišo tša pele di laetša gore sefatanaga seo se utswitše Zebediela ka kgwedi ya Mopitlo.

 

Maphodisa a ile a phuruphutša lefelo leo ka botlalo mme a hwetša sefatanaga sa bo bedi sa Toyota Tazz seo se begilwego gore se utswitšwe ka kgwedi ya Diphalane 2024, Seshego.

 

Mmoleledi wa maphodisa a Limpopo Colonel Malesela Ledwaba o re bagononelwa ba bararo ba golegilwe.

 

“Magareng ga bona ke mogononelwa wa mofaladi wa mengwaga ye 49 yo e le go mong wa lefelo leo. Go hweditšwe gore o tsene ka Afrika Borwa ntle le mangwalo mme a pharilwe ka molato o mongwe wa go tshela molao wa bofaladi,” a realo.

 

Ledwaba o re molato wa go hwetšwa le sefatanaga seo se gononwago gore se utswitšwe o butšwe setišing sa Westernburg.

 

“Bagononelwa ba ile go tšwelela pele ga kgoro ya tsheko ya Polokwane ka Labohlano, 11 Mosegamanye,” a realo.

 

Mokhomišinare wa maphodisa a Limpopo Lieutenant-General Thembi Hadebe o amogetše go golegwa ga bagononelwa ba mme a reta maeteko a go netefatša gore difatanaga tšeo di utswitšwego di ya hwetšagala.

 

“Go fedišwa ga difatanaga tša mabonwa tšeo di utswago go swana le se sa Porche di laetša bohodu bjo bo rulagantšwego. Re ikemišeditše go fetša ka bohodu bjo go tšwa modung wa bjona mme mahodu a lebagane le molao,” gwa realo Hadebe.