Molekgotlaphethiši Dieketseng Mashego o etetše Mapeu Hlanga yo a fišitšwego ka esiti ntweng ya marato  

Ka Mogale Mohale

Molekgotlaphethiši wa kgoro ya Maphelo, Dieketseng Mashego o etetše Mapeu Hlanga yo a fišitšwego ka esiti.

 

Se ke ka morago ga dikgonono tša gore kgarebe ye ya mengwaga ye 27 go tšwa Zebediela ka ntle ga Polokwane, Limpopo a hlaselwe ka esiti ke Ivyone Maja (25) ka kgwedi ya Diphalane 2024 ka morago ga go mo latofatša ka go ratana le molekane wa gagwe.

Esiti yeo e mo fišitše sefahlego le mmele, mme ga a sa bona gabotse. Mohlasedi wa gagwe, Ivyone o ile a golegwa ka la 14 Dibokwane 2025 mme a tšwelela pele ga kgoro ya tsheko ya Zebediela ka la 15 Dibokwane moo a hweditšego peili ya R3 000.

 

Molato o ile wa šotišetšwa kgorong ya tsheko ya Mokopane moo a tšweletšego ka Labobedi, 1 Mosegamanye mme molato wa šotišetšwa go Mošupologo, 21 Mosegamanye.

 

Mmoleledi wa maphodisa a Limpopo Colonel Malesela Ledwaba o re tiragalo ye e diregile ka lapeng la molekane yo go bolelwago ka yena.

 

“Dinyakišišo molatong wo di tšwela pele,” a realo.

 

Tiragalo ye e phatlaletše matlakaleng a dikgokaganyo mme e tlogetše setšhaba se befetšwe, ebile se nyaka gore Mapeu a hwetše toka.

 

Molekgotlaphethiši Mashego yo a mo etetšego ka Labobedi, 8 Mosegamanye o re o ema le Mapeu leetong la gagwe le boima mme o mo lakaletša pholo le maatla.

 

O laeditše Ditebogo tša gagwe go kgoro gammogo le bookelo bja Mankweng mošomong wo ba o dirilego go thuša gore a kaonafale.

 

“Ke reta boitshepo bja gagwe bja go dira gore a kgone go bolela phatlalatša. Re swarane le yena leetong la gagwe la pholo mme re mo lakaletša maatla,” a realo.