Badudi ba tsenetše mogwanto mabapi le hlokego ya meetse

Hlokego ya meetse e gapeleditše badudi go tšea magato.

Badudi Ga-Sekgopo karolong ya Lehlareng ka ntle ga Modjadjiskloof, Limpopo ba tsenetše mogwanto ka Mošupologo, 21 Mosegamanye ka lebaka la hlokego ya meetse.

Ba re ba na le kgwedi tše tharo ba se na meetse ao a tšwago dipompong. Go laetša go befelwa, ba ile ba tswalela tsela ya R81 ka makala a mehlare le maswika.

Ba laeditše pefelo le go kwa bohloko, ba bolela gore ba tlaišega kudu ka lebaka la go hloka meetse.

Moetapele wa setšhaba, Timothy Maluleke, o re badudi ga ba hwetše ditirelo tše ba di holofeditšwego.

“Ke bothata bjo bogolo gore badudi ba swanetše go gwanta pele ba ka fiwa ditirelo. Meetse a gona mo motseng ebile go na le melete ya meetse, eupša dipompo di omeletse,” a realo.

Maluleke o re le taba ya go fetša beke go se na meetse ke selo seo se sa amogelegego. “Batho ba go hloka ba a tlaišega. Le ge re sa thekge mogwanto, ke nnete gore ge baetapele ba palelwa, batho ba tla ba le magomo a kgotlelelo,” a bolela.

Badudi ba bangwe ba boletše gore ba šomiša ditšhelete tša bana tša SASSA go reka meetse go bao ba rekišago. Badudi ba palelwa ke go hlapa, go apea le go hlatswa diaparo.

Kgaogelo Mabaloi o re ge ba botšiša ka meetse, ba nyatšwa. “Ba botšišwa gore ba iša kae meetse ka gore ga ba hlape ebile ba nkga. Seo ke thogako. Ka dinako tše dingwe re hwetša meetse gabedi ka kgwedi gomme,” a realo.

Mmoleledi wa masepala wa selete sa Mopani, Odas Ngobeni, o re ba tseba ka bothata bja hlokego ya meetse Ga-Sekgopo.

“Re feditše go dira tekolo tša meetse a ka fase ga mobu gomme ra bona gore go nyakega melete go oketša kabo ya meetse bjalo ka karolo ya mathomo ya porojeke ya tlaleletšo ya meetse. Taba ye e tla akaretša le kabo ya diphaephe ge re emetše tumelelo ya tshelete go tšwa go lefapha la Water Service Infrastructure Grant,” a hlaloša.

Ngobeni o re ka nako ye, ba šomiša dilori tša ditanka tša meetse go dikarolo tšeo di sa fihlelelwego ke ao a le go gona.