SETŠHABA SA GA-MARISHANE SE RETILWE KA MORAGO GA GO THUŠA MAPHODISA GO SWARA MOGONENGWA WA GO KATA LE GO BOLAYA MOKGEKOLO

Setšhaba sa Nebo ka Seleteng sa Sekhukhune se thušitše maphodisa go swara mogononelwa wa mengwaga ye 35 mabapi le go kata le polao ya sehlogo ya mokgekolo  wa mengwaga ye 63 go tšwa motseng wa Ga-Marishane.

Colonel Malesela ledwaba ore tiragalo ye e diregile ka Sontaga sa di 20 Diphalane 2025, mo e ka bago ka iri ya bone thapama ge mokgekolo yo a hwetšwa a bolailwe ka legaeng la gagwe.

“Go bolelwa gore mogononelwa o bonwe a tloga lefelong la bodulo la mohu pejana mesong yeo, pele setšhaba ka morago se utolla setopo sa gagwe seo se sa phelego. Maphodisa a tsebišitšwe ka pela gomme a ba gona lefelong la tiragalo,”Ledwaba.

Go ya ka Ledwaba, ka Labone, October 23, maloko a setšhaba a ile a bona mogononelwa a boela gae ka nako ya 1 a.m. gomme a tsebiša maphodisa ka pela, ao a ilego a fihla gomme a mo swara. 

Ka morago ga tlhahlobo ya ka morago ga lehu, mogononelwa o lebane le ditatofatšo tša tlaleletšo tša go kata go bapa le molato wa mathomo wa polao. O rulaganyeditšwe go tšwelela kgorong ya tsheko ya Mmaseterata ya Nebo ka la 24 Diphalane 2025.

Molefotenente General Thembi Hadebe, Mokhomišenare wa Maphodisa wa Profense ka Limpopo, o retile setšhaba ka go phafoga le tirišano ya bona, tšeo di bilego le seabe go swara mogononelwa ka katlego.