Ramaphosa o nyaka gore Nkabane a hlalose maitshwaro a gagwe Palamenteng
Ramaphosa o nyaka gore Nkabane a hlalose maitshwaro a gagwe Palamenteng
Mopresidente Cyril Ramaphosa o kgopetše semmušo pego ye e tletšego go tšwa go Tona ya Thuto ya Godimo Nobuhle Nkabane mabapi le maitshwaro a gagwe nakong ya ge a tšwelela Palamenteng bekeng ya go feta.
Se se tla morago ga gore Nkabane, a bontšhe lenyatša ge a be a araba dipotšišo go tšwa go maloko a palamente ka ga tlhamo le boitshwaro bja phanele ya baeletši ya Sector Education and Training Authority’s (SETA).
Nkabane o ile a bonwa a sohla dijo ebile a gana go hlaloša gore go thwala mo go botegago ke eng.
Mmoleledi wa mopresidente Vincent Magwenya o boditše boraditaba ka Labone gore Ramaphosa o kgopetše gore Nkabane a mo fe pego ye e tletšego ka ga maitshwaro le moko wa ditaba wa go boledišana ga gagwe le Palamente.
“Kgopelo ya pego ye e lebeletšwe tebelelo ya mopresidente ya gore matona, batlatšaditona le bakhuduthamaga ba bagolo ka lefapheng la rena la mmušo ba itshwara ka tsela ya profešenale, pepeneneng le ka borutho ge ba boledišana le Palamente le dihlongwa tše dingwe tša boikarabelo.”
“Mopresidente o tla leboga pego ya tshepedišo yeo e dirilwego go thwala maloko a boto go SETA ao a bego a le bogareng bja dipotšišo tša komiti ya potefolio,” Magwenya o boletše.
Tona o ile a gapeletšega go gogela morago go thwala batho morago ga matshwenyego a setšhaba ka ga tshepedišo ya kgetho.
Bao ba thwetšwego mathomong ba be ba akaretša morwa wa tona ya kabinete Gwede Mantashe, gammogo le tonakgolo ya peleng ya KwaZulu-Natal Nomusa Dube-Ncube, le moetapele wa ANC Johannesburg Loyiso Masuku.
