Stan Mathabatha o biditšwe Luthuli House go hlaloša mabaka a gagwe a go ikgaoganya le maemo a gagwe bjalo ka modulasetulo wa ANC profenseng ya Limpopo
ANC e biditše Modulasetulo wa Limpopo, Stan Mathabatha go ya Luthuli House go la Johannesburg, Gauteng go hlaloša mabaka a gagwe a go ikgaoganya le maemo gotee le boemo bja gagwe ka ga “go senyega ga boleng bja ANC”.
Mongwaledipharephare wa ANC, Fikile Mbalula o rulagantše kopano le Mathabatha go sekaseka ditaba tše di tlišitšwego. Se se tla latela ka kopano le boetapele bja profense ya Limpopo ka Labone.
Mathabatha o kgopetše go ikgaoganya bjalo ka modulasetulo wa ANC profenseng ya Limpopo, a bolela ka matshwenyego a mabapi le maitshwarompe le go tlogela mekgwa ye megolo ya mokgatlo.
O boletše gore go ata ga maitshwarompe le go senyega ga botshepegi bja mokgatlo, kudu mabapi le dikopano tša go kgetha baetapele ba dilete tša Vhembe le Waterberg ke mabaka a magolo a sephetho sa gagwe.
ANC e netefaditše gore e amogetše lengwalo leo, gomme ya bolela gore taba ye e tla rarollwa ka tsela ye e swanetšego.
Le gona, mokgatlo o bontšhitše go se thabele tsela ye ditaba tše di phatlaladitšwego ka yona mo dikgokaganong tša leago pele ga gore di tsebišwe ka mekgwa ya ka gare.
“ANC e bontšha go befelwa ka ge lengwalo le la mathomo le bonwe dikgokaganong tša leago pele go ka latelwa mekgwa ya ka gare ya mokgatlo.
Re boeletša gore mekgwa ya mokgatlo e swanetše go latelwa ka mehla, mme taolo ya ka gare e hlomphege go ya ka molaotheo wa ANC,” gwa realo Mbalula.
Ka nako ye, matshwenyego a Mathabatha a tla morago ga matshwenyego a ma ntši go tšwa go maloko a mokgatlo ka ga seemo sa ANC le ka moo e fetogilego sefahlego sa bomenetša, mme e le mokgatlo wo o palelwago ke go phethagatša maikemišetšo a wona.
